Еңбекпен өрілген абыройлы жол

Кей адамдардың қызметі, еңбек өтілі мен марапаттарын тізіп қана айту аздық етеді. Өйткені олардың еңбегі ең алдымен айналасындағы адамдардың сенімінен, шәкірттерінің жетістігінен, әріптестерінің құрметінен, туған жеріне жасаған игі істерінен көрінеді. Жұмазия Қабиқызы Инирбаева – осындай жан.

Ол үшін мектеп – жай ғана жұмыс орны емес. Мұнда оның күнделікті еңбегі, шәкірттерінің қуанышы мен жетістігі, әріптестерімен бірге өткізген жылдары жатыр. Ұстаз ретінде ол балаға білім берумен қатар, оның бойына адамгершілік, еңбекқорлық, туған жерге деген сүйіспеншілік сіңіруге ерекше мән береді. Ал шәкірттерінің байқаулар мен олимпиадалардағы әрбір жетістігі – ұстаз үшін үлкен қуаныш.

Жұмазия Қабиқызының еңбек жолындағы ерекше бір белес – кәсіподақ қызметі. 2004 жылдан бері, міне, 22 жыл бойы ол бастауыш кәсіподақ ұйымына жетекшілік етіп келеді. Осы жылдардың артында күнделікті көзге көріне бермейтін қаншама жұмыс бар. Әріптесін тыңдау, қиын сәтте қолдау көрсету, еңбек мәселесінде бірге шешім іздеу, қуанышын бөлісу – оның кәсіподақ жұмысындағы басты ұстанымы. Сондықтан да әріптестері оған сенім артады.

Жұмазия Қабиқызының жанашырлығы мектеппен ғана шектелмейді. Бидайық – шағын ауыл. Осындай ауылдың тіршілігі туған жеріне бейжай қарамайтын адамдардың арқасында жандана түседі. Мұнда қазақтың көрнекті қайраткері Міржақып Дулатұлына арналған мұражай бар. Алыстан ат арытып келген қонақтарды қарсы алу, ауыл тарихымен таныстыру, қазақы ықыласпен шығарып салу кезінде де Жұмазия Қабиқызы әрдайым ортадан табылады.

Оған ауыл мектебінің тағдыры да ерекше жақын. Өйткені шағын ауылда мектептің шамы сөнбесе, баланың күлкісі естіліп, ұстаздың үні үзілмесе – ауылдың да ертеңі бар. Сондықтан мектеп пен Бидайықтың болашағына қатысты әрбір іс ол үшін ортақ шаруа ғана емес, жүрегіне жақын дүние.

Еңбегі түрлі марапаттармен бағаланғанымен, Жұмазия Қабиқызы үшін ең үлкен марапат – адамдардың сенімі, әріптестерінің құрметі мен шәкірттерінің жетістігі.

Жиырма екі жыл кәсіподақ ұйымының басында, сан жыл шәкірттері мен әріптестерінің жанында, туған ауылының тыныс-тіршілігімен бірге келе жатқан Жұмазия Қабиқызының еңбек жолы – елге қызмет етудің қарапайым да қадірлі үлгісі.

Жангелді ауданы Бидайық бастауыш мектебінің бастауыш кәсіподақ ұйымы