Дәстүрлі құндылықтарға адалдық – сенім мен дамудың негізі

Білім беру саласының жергілікті кәсіподағы

Дәстүрлі құндылықтарға адалдық – сенім мен дамудың негізі

Білім саласының жергілікті кәсіподағына сұранысты сақтап, дамуға не көмектеседі? Оның қызметінің негізінде қандай құндылықтар жатыр және біздің ұйымға деген сенім қалай қалыптасады?

10 қазанда Қазақстанда Кәсіподақтар күні атап өтіледі. Бұл – осы сұрақтарға жауап беріп, кәсіподақ мүшелеріне көрсетіліп жатқан нақты қолдау мен олардың бүгінгі мүмкіндіктері туралы айтуға жақсы себеп.

Күйзелісті қойып, алға ұмтылу

Жуырда өткен Республикалық тамыз педагогикалық конференциясында Президент Қасым-Жомарт Тоқаев: «Өзіне сенімсіз, жасық, әр нәрсеге мұңая беретін, үнемі күйзелісте жүретін кертартпа адамның болашағы бұлыңғыр», – деп айтып өтті.

Бұл ой бізге ерекше жақын. Соңғы бірнеше жыл Жергілікті кәсіподақ үшін оңай болған жоқ. Бірақ біз тоқтаған жоқпыз және өз қағидаттарымыздан бас тартқан  жоқпыз. Шешімдер іздеуді, кәсіподақ мүшелеріне қолдау көрсетуді және әрбір, тіпті шағын нәтижені де бағалауды жалғастырдық.

Дегенмен, дәстүрлі кәсіподақ құндылықтары – еңбек адамына құрмет, өзара көмек және ұрпақтар сабақтастығы өзгеріссіз қалды. Жергілікті кәсіподақ Алқасының шешімімен 2026 жыл Дәстүрлі құндылықтар жылы болып жарияланып, осы игі құндылықтарға арналды.

Бүгінде осы жүйелі жұмыстың нәтижесін көріп отырмыз. Қостанай облысы білім және ғылым ұйымдары қызметкерлерінің жергілікті кәсіподағы өңірдегі ең ірі қоғамдық ұйымдардың бірі болып отыр және 25 мыңнан астам білім саласы қызметкерін біріктіреді. Қатарымызға жаңа ұжымдар қосылып, бастауыш кәсіподақ ұйымдары қайта оралуда.

Бұл – сенімнің маңызды көрсеткіші. Сенім әкімшілік шешіммен пайда болмайды. Оған нақты істермен, әр өтінішке назар аударумен және кәсіподақ мүшелерінің мүдделерін дәйекті қорғауға дайын болумен ғана қол жеткізуге болады.

Нәтижелі қорғау

Биылғы жылдың маңызды нәтижелерінің бірі – Қостанай облысы білім басқармасымен қосымша келісімге қол қою. Ол білім саласы қызметкерлерінің әлеуметтік кепілдіктерін кеңейтіп, Жергілікті кәсіподақ ұйымына мүше болу нақты артықшылықтар беретінін тағы бір мәрте растады.

Ең елеулі өзгерістердің бірі – кәсіподақ мүшелері болып табылатын қызметкерлердің көпшілік санаты үшін ақы төленетін еңбек демалысының ұзақтығын ұлғайту. Негізгі және қосымша демалыстарды қоса есептегенде, қызметтік үй-жайларды тазалаушылар, балабақша аспаздары мен тәрбиеші көмекшілері енді 42 күнтізбелік күнге дейін, бухгалтерлер – 39 күнге дейін, қосалқы жұмысшылар, хатшылар мен кітапханашылар – 36 күнге дейін демала алады. Жаңа нормалар іс жүзінде қолданылып жатыр: биыл жазда кәсіподақ мүшелері ұзартылған еңбек демалысты пайдаланды.

Қосымша келісімде кәсіподақ белсенділері мен бір білім беру ұйымында ұзақ жыл еңбек еткен қызметкерлерді қолдаудың жаңа шаралары қарастырылған. Жоғары кәсіби жетістіктерге қол жеткізген педагогтер үшін кепілдіктер кеңейтілді. Бұл саланың кадрлық әлеуетін сақтауда маңызды.

Жаңа нормаларды түсіндіру мақсатында Жергілікті кәсіподақ аппараты бастауыш кәсіподақ ұйымдарының төрағалары және білім беру ұйымдарының басшыларымен семинар-кеңестер өткізді. Келісімнің толық мәтінімен Жергілікті кәсіподақтың www.lprofedu.kz ресми сайтында танысуға болады.

Біздің кәсіподақ мүшелері әрқашан білікті құқықтық көмек ала алатынын біледі. Заң қызметіне күн сайын он шақты өтініш түседі. Көбіне олар еңбекақы төлеуге, жұмыс уақытына, оқу жүктемесіне, демалысқа және жұмыс орындарын сақтауға қатысты.

Әр өтініштің артында шешуді қажет ететін нақты жағдай тұр. Біздің міндетіміз – адамға кеңес берумен ғана шектелмей, бұзылған құқықтарын қалпына келтіруге көмектесу.

Мәселен, Жергілікті кәсіподақ араласқаннан кейін мектепалды даярлық сыныбы тәрбиешісін қысқарту туралы хабарлама кері қайтарылып, қызметкер өз лауазымын сақтап қалды. Тағы бір жағдайда қызметкердің заңсыз азайтылған апталық оқу жүктемесі бұрынғы көлеміне қайта қалпына келтірілді. Сондай-ақ кәсіподақ мүшелерінің жүктілікке және босануға байланысты демалысқа шығу кезінде жоғалтқан табысын өтеуге қол жеткізілді.

Бұл – кәсіподақтың қызметкерлерді қорғау бағытындағы жұмысының нақты  нәтижелерін көрсететін бірнеше мысал ғана.

Айта кетерлігі, кеңес алу үшін білім саласы қызметкерлері ғана емес, ұйым басшылары – біздің әлеуметтік әріптестеріміз де жүгінеді. Бұл көмегіміздің сұранысқа ие екенін және Жергілікті кәсіподаққа сенім бар екенін көрсетеді.

Педагогтердің мүдделерін қорғау республикалық деңгейде де жүргізілуде. Қазақстан Республикасы Оқу-ағарту министрлігінің Білім саласында сапаны қамтамасыз ету комитетінің бұйрығымен «Педагогикалық әдептің кейбір мәселелері туралы» №190 бұйрыққа өзгерістер мен толықтырулар енгізу жөніндегі жұмыс тобы құрылды.

Жұмыс тобына 15 адам кірді. Кәсіподақтардан жалғыз өкіл ретінде Жергілікті кәсіподақ төрағасының орынбасары Айгүл Төлебаева енді. Бүкіл педагогикалық қауымдастық үшін маңызды өзгерістерді талқылауға дәл біздің бірлестіктің өкілі қатысатыны біз үшін ерекше маңызды.

Сондай-ақ біз Қазақстан Республикасы оқу-ағарту саласы қызметкерлерінің еңбек жағдайларын, жұмыспен қамтылуын және әлеуметтік кепілдіктерін белгілеу жөніндегі 2027–2029 жылдарға арналған әлеуметтік әріптестік туралы Салалық келісім жобасын әзірлеу жөніндегі жұмыс тобының құрамына кіреміз. Бұл жұмыс аяқталуға жақын.

Құқықтық білім және тиімді бақылау

Құқықтық ағартуға ерекше көңіл бөлеміз. Биыл еңбек заңнамасы, салықтық шегерімдер, кепілдіктер мен өтемақы төлемдері жөніндегі өзекті мәселелер бойынша әдістемелік материалдар, ақпараттық бюллетеньдер мен инфографикалар дайындалды. Барлық материалдар Жергілікті кәсіподақтың ресми сайтында қолжетімді.

«Бәрін білгім келеді!» атты кәсіподақ жинақтарының сериясын да жалғастырып келеміз. Қазір білім беру ұйымдары қызметкерлерінің дербес деректерін қорғауға арналған жаңа шығарылымды әзірлеудеміз. Цифрлық технологиялар белсенді қолданылатын қазіргі жағдайда бұл тақырып ерекше өзекті. Жинақта заңнаманың негізгі нормалары мен түсінікті практикалық ұсынымдар беріледі.

Еңбек құқықтарын қорғаудың тағы бір маңызды құралы – Әлеуметтік әріптестік туралы келісім мен ұжымдық шарттардың орындалуына қоғамдық бақылау жүргізу. 2026 жылы облыстың сегіз білім беру ұйымында қоғамдық бақылау жүргізілді: Арқалықтың үш ұйымында, облыстық деңгейдегі бір ұйымда, сондай-ақ Әулиекөл және Қарабалық аудандарының әрқайсысындағы екі ұйымда.

Мониторинг Келісім мен ұжымдық шарттарда көзделген негізгі міндеттемелердің орындалып жатқанын көрсетті. Қоғамдық бақылаудан табысты өткен ұйымдарға дипломдар мен сапа белгісі – «Қоғамдық бақылау» мүсіншесі табысталды. Алдағы уақытта бұл жұмыстың бір бөлігін Жергілікті кәсіподақ филиалдарына беру жоспарлануда.

Еңбек қатынастарының өзекті мәселелерін Жергілікті кәсіподақ күндері барысында да түсіндіреміз. Жаңа оқу жылындағы алғашқы осындай кездесу Федоров ауданында өтті.

Алдын алу және құқық қорғау жұмысының тиімділігін 2026 жылдың өткен кезеңінде Білім басқармасы жанындағы Келісу комиссиясына бірде-бір еңбек дауының түспегені де көрсетеді.

Нақты көмек пен қолжетімді мүмкіндіктер

Кәсіподақ қолдауы еңбек мәселелерімен шектелмейді. Бұл жұмыста 2021 жылдан бері Қазақстан Республикасының «Кәсіптік одақтар туралы» Заңының 16-бабына сәйкес жұмыс істеп келе жатқан «Мейірім» көмек қоры ерекше орын алады. Осы уақыт ішінде 850-ден астам кәсіподақ мүшесі көмек алды, ал төлемдердің жалпы сомасы 100 миллион теңгеден асты.

Бұл көмектің адамдар үшін қаншалықты маңызды екенін көмек алушылардың пікірлері жақсы көрсетеді. Олармен Жергілікті кәсіподақтың Instagram желісіндегі @profcoyuz_obrazovanie ресми парақшасында танысуға болады.

Жергілікті кәсіподақ өз мүшелері мен олардың отбасылары үшін санаторий-курорттық сауықтыру мүмкіндіктерін кеңейтіп келеді. Біз елдегі шипажайлардың ұсыныстарын зерттеп, республикалық және өңірлік деңгейдегі сұранысқа ие санаторийлермен шарттар жасастық. Олардың қатарында «Сосновый бор», «Жайлау», М. Қарабаев атындағы Қостанай облыстық оңалту орталығы, «RICH HOUSE», «Алтынай» және басқалары бар.

2026 жылдың басынан бері Жергілікті кәсіподақтың 450-ден астам мүшесі санаторий-курорттық сауықтырудан өтті. Ерте брондау жолдамалардың құнын едәуір төмендетуге мүмкіндік берді: жекелеген бағыттар бойынша үнем 70 мың теңгеге жетеді.

Балалардың демалысына да үлкен көңіл бөлінеді. Осы жазда кәсіподақ мүшелерінің отбасыларынан шыққан 300-ге жуық бала қала сыртындағы сауықтыру лагерьлерінде демалды. Жолдамалар құнының бір бөлігін дәстүрлі түрде кәсіподақ төледі.

Кәсіподақ туризмі де дамып келеді. Жыл басынан бері түрлі сапарларға 350-ге жуық кәсіподақ мүшесі қатысты. Олар үшін Түркістанға, Алматыға, Ыстықкөлге, Бурабайға, сондай-ақ Өзбекстан мен Грузия қалаларына саяхаттар ұйымдастырылды. Туған өлкенің тарихы мен көрікті жерлерін жақынырақ тануға мүмкіндік беретін Меңдіқара және Сарыкөл аудандары бойынша бағыттар да танымал.

Ортақ құндылықтар мен игі дәстүрлер

Кәсіподақ өмірінің маңызды бөлігі – облыстың әртүрлі қалалары мен аудандарынан кәсіподақ мүшелерін біріктіретін ортақ іс-шаралар.

2026 жыл 5–6 қаңтарда Меңдіқара ауданындағы М. Қарабаев атындағы шипажай базасында өткен «Спорт, оқу және демалыс – кәсіподақ біздің сенімді досымыз!» атты көшпелі іс-шарамен белсенді басталды. Ол облыстық филиалдың, Рудный қаласының, Әулиекөл, Ұзынкөл және Меңдіқара аудандарының жас әрі тәжірибелі кәсіподақ белсенділерін біріктірді.

Бағдарламаға таза ауадағы спорттық жарыстар, пікірталастар және кәсіподақтық оқыту кірді. Интерактивті кәсіподақ сағатында қатысушылар құқықтық қорғау, әлеуметтік-экономикалық қолдау, ақпараттық жұмыс пен кәсіподақтық оқытуды ұйымдастыру мәселелерін талқылап, практикалық кеңестер алып, тәжірибе алмасты.

Мұндай формат пайдалы ақпаратты белсенді демалыспен ұштастыруға, филиалдар арасындағы өзара іс-қимылды нығайтуға және ортақ жұмыстың жаңа бағыттарын белгілеуге мүмкіндік берді.

Дәстүр бойынша қыстың соңғы күнінде «Құмарлық! Денсаулық! Демалыс!» отбасылық спартакиадасы өтті. Биыл ол Дәстүрлі құндылықтар жылы аясында ұйымдастырылды. Өйткені өмір бойы бізбен бірге болатын және ұрпақтарды байланыстыратын құндылықтар дәл отбасында қалыптасады.

Қатысушылар әртүрлі күрделі тапсырмалармен қашықтықтарды еңсеріп, күшін, ептілігін және бірлесе әрекет ету қабілетін көрсетуі керек болды.

Спортты бұрыннан өмір салтына айналдырған Сарыкөл ауданынан Петровтар – Кучеренко отбасы жеңімпаз атанды. Екінші орынды белсенді отбасылық демалысты ұнататын Жітіқара ауданынан Романовичтер отбасы иеленді. Үшінші орын Лисаковск қаласынан Жұмабаевтар отбасына бұйырды. Бұл – бір-біріне әрдайым қолдау көрсетіп, ортақ жетістіктің қуанышын бөлісетін тату әрі ұйымшыл команда.

Спартакиада жеңімпаздары мен жүлдегерлері грамоталармен және кәсіподақ сыйақыларымен марапатталды. Барлық қатысушылар кәсіподақтан жағымды сыйлық – «Therma Park» сауықтыру кешеніне бару сертификаттарын алды.

Тағы бір ауқымды оқиға – Каменное көлінің жағасында өткен Жергілікті кәсіподақтың IV облыстық туристік слеті. Оған 150-ден астам кәсіподақ мүшесі, облыстың қалалары мен аудандарынан 17 команда қатысты.

Ашылу рәсімінің ерекше сәті – Жергілікті кәсіподақ Алқасы тағайындаған «Кәсіподақ сенімі» төсбелгісін жас кәсіподақ белсенділеріне табыстау болды. Бұл марапат қоғамдық жұмыста өзін танытып үлгерген кәсіподақ қозғалысының жаңа буын өкілдеріне берілді.

Слет бағдарламасына туристік эстафета, бивуактар, туристік әндер мен экспресс- газеттер байқаулары кірді. Бірінші орынды Рудный қалалық филиалының командасы, екінші орынды Сарыкөл ауданы, үшінші орынды Ұзынкөл ауданы иеленді.

Жеңімпаздар мен жүлдегерлер Жергілікті кәсіподақтың дипломдары мен ақшалай сыйлықтарын алды. Барлық командалар қатысқаны үшін грамоталармен және кәсіподақ сыйақыларымен марапатталды.

Мұндай кездесулер араласуға, тәжірибе алмасуға, спортта қабілет көрсетуге және отбасымен бірге уақыт өткізуге мүмкіндік береді. Игі кәсіподақ дәстүрлері осылайша сақталып, ұйымдарымыз арасындағы байланысты нығайтады.

Дәстүрлі құндылықтар жылы аясында Жергілікті кәсіподақ «Бізді біріктіретін дәстүрлер» атты онлайн бейнероликтер байқауын өткізді. Ол үлкен қызығушылық тудырды: жеңіс үшін облыстың түкпір-түкпірінен 48 бастауыш кәсіподақ ұйымы бақ сынады.

Қатысушылар өз ұжымдарының дәстүрлері, отбасылық құндылықтар, еңбекке құрмет және ұрпақтар сабақтастығы туралы баяндады. Әр бейнеролик өзінше жарқын әрі шынайы шықты. Байқау жұмыстары 200 мыңнан астам қаралым мен ондаған мың оң реакция жинап, бұл тақырыптың адамдарға қаншалықты жақын екенін көрсетті.

Жеңімпаздар мен жүлдегерлерді құзыретті қазылар алқасы анықтады. Бірінші орынды Әулиекөл ауданы Құсмұрын №2 мектебінің бастауыш кәсіподақ ұйымы иеленді. Екінші орында – Жангелдин ауданы Ыбырай Алтынсарин атындағы мектептің бастауыш кәсіподақ ұйымы. Үшінші орын Қостанай ауданы Садчиков мектебінің бастауыш кәсіподақ ұйымына берілді.

Көрермен көзайымы жүлдесінің иегерін дәстүрлі түрде жазылушыларымыз таңдады. Бұл аталымда Рудный қаласының №8 мектебінің бастауыш кәсіподақ ұйымы жеңіске жетті: оның бейнеролигі Instagram желісінде ең көп лайк, пікір және репост жинады.

№8 мектептің биыл ғана ашылғаны ерекше қуантарлық жағдай. Онда бастауыш кәсіподақ ұйымы жақында ғана құрылса да, белсенділігін, ұйымшылдығын және бірлесіп жұмыс істеу қабілетін көрсетіп үлгерді.

Байқау жеңімпаздары мен жүлдегерлері дипломдармен және кәсіподақ сыйақыларымен марапатталды. Алайда ең басты нәтиже – дәстүрлерді сақтап, ұрпақтан-ұрпаққа жеткізіп, жаңа мазмұнмен толықтырған кезде ғана өмір сүретінін еске салған ондаған оқиғалар.

Ашықтық және жаңа форматтар

Жергілікті кәсіподақ ақпараттық жұмысты дамытып, қарым-қатынастың жаңа форматтарын меңгеруде. Біздің міндетіміз – қызмет нәтижелері туралы ашық айту, сұрақтарға жедел жауап беру және пайдалы ақпаратты әрбір кәсіподақ мүшесіне қолжетімді ету.

Осы мақсатта ресми сайтты, әлеуметтік желілерді, бұқаралық ақпарат құралдарын, ақпараттық бюллетеньдерді және басқа да цифрлық ресурстарды пайдаланамыз.

Ақпараттық алаңдарымызға қызығушылық артып келеді. Мысалы, соңғы бір жылда Жергілікті кәсіподақтың @profcoyuz_obrazovanie Instagram аккаунтының аудиториясы екі еседен астам өсіп, 10 мыңнан 24 мың жазылушыға жетті. Соңғы үш айдың өзінде жарияланымдар 2,5 миллион қаралым жинады.

Негізгі жобалардың бірі – «Ашық кәсіподақ». Оның аясында «Учительская плюс» газетінің беттерінде аппарат пен филиалдардың жария есептері орналастырылады. Соның арқасында кәсіподақ мүшелері жұмысымыздың нақты нәтижелерін көре алады.

Еңбек адамдарына, тәлімгерлер мен кәсіби әулеттерге арналған «Еңбек жолы» жобасы ерекше орын алады. Дәстүрлі құндылықтар жылында оның басты тақырыбы ұрпақтар сабақтастығы болды. Жыл басынан бері 70-тен астам материал жарияланды. Бұл- 2022 жылы жобаны жүзеге асырудың алғашқы жылындағы көрсеткіштен үш есеге жуық көп.

Мәселен, ғашықтар мерекесі – Қозы Көрпеш пен Баян сұлу күні қарсаңында біз бір-біріне деген махаббаты ортақ кәсіпке деген сүйіспеншілікпен ұштасқан отбасылардың өнегелі тарихын ұсыныдық. Кейбір кейіпкерлер үшін бұл – бірге бастаған ортақ жолдың бастауы болса, ал енді бірі үшін – отбасында да, жұмыста да бірге өткізген ондаған жылдар.

Осындай оқиғалардың бірі – Альбековтер отбасы. Рүстем мен Ксения Қарабалық ауданындағы Сарыкөл негізгі орта мектебінде педагог болып жұмыс істейді. Олардың үлгісі мектепке қызмет етудің отбасының ортақ ісіне қалай айналатынын көрсетеді.

Жарияланымдарымыздың бірінің кейіпкерлері – Әулиекөлдегі Сұлтан Баймағамбетов атындағы мектеп-гимназия педагогтері Салтанат пен Болатбек Бекмағанбетовтер. Салтанат бастауыш сынып оқушыларын оқытады, Болатбек дене шынықтыру пәнінің мұғалімі. Ерлі-зайыптылар кәсіби байқаулар мен спорттық жарыстарда бірнеше мәрте жүлдегер атанған.

Біздің кәсіподақ бірлестігінде шаңырағы берік, ынтымағы жарасқан отбасылар аз емес. Олардың әрқайсысында түрлі халықтардың дәстүрлері қастерленіп,  өзара үйлесім тауып, ұрпақтан ұрпаққа жалғасып келеді.

Қазақстан халқының бірлігі күні қарсаңында жобаның кейіпкерлері Қостанай қызмет көрсету саласы колледжінен Захарьевтер, Ұзынкөл ауданы Новопокров мектебінен Баймұратовтар, Әулиекөл ауданы Құсмұрын №2 мектебінен Қаманғалиевтер, Қарабалық ауданы Станционный мектебінен Кузнецовтар, Ұзынкөл ауданы Соколов мектебінен Нұғмановтар және Қарасу ауданы Ключевой мектебінен Сагитовтар отбасылары болды.

Олардың тарихы – сүйіспеншілік, өзара құрмет және бір-бірінің мәдениеті мен салт-дәстүріне ұқыпты қарау туралы. Нағыз бірлік осындай отбасылардан басталады.

Жоба тек отбасылар туралы ғана емес, тәлімгерлер, жас педагогтер және еңбек әулеттері туралы да баяндайды. Кейіпкерлер қатарында жас әріптестеріне тәжірибесімен бөлісіп жүрген Жангелдин ауданынан педагогикалық еңбек ардагері Әсия Исмағұлова; өзінің бұрынғы оқушысы, бүгінде еңбек жолын енді бастаған педагог Полина Письмакқа мамандықтағы алғашқы қадамдарын жасауға көмектесіп жүрген Ұзынкөл ауданы Новопокров мектебінің тәлімгері Гүлбар Давлетова; мамандыққа деген сүйіспеншілік шамамен 200 жыл бойы ұрпақтан ұрпаққа беріліп келе жатқан Амангелді ауданынан Жұмағұловтар әулеті; ерекше білім беру қажеттіліктері бар балаларды қолдау орталығының тәрбиеленушісінен осы орталықтың тәрбиешісіне дейінгі жолдан өткен Рудный қаласының жас педагогі Алёна Козина бар.

Кәсіподақ дәстүрлері сақталып қана қоймай, цифрлық кеңістікте жаңа сипат алуда. Бесінші жыл қатарынан біз ұйымдарымыздың мазмұнды, қызықты және шығармашылыққа толы аккаунттарын анықтап, қолдауға мүмкіндік беретін «Үздік ақпараттық кәсіподақ ресурсы» байқауын өткіземіз.

Биыл Жергілікті кәсіподақ филиалдары арасында «Облыстық деңгейдегі білім беру ұйымдарының кәсіподақ ұйымдары» филиалының @oblprofsojus_kst Instagram аккаунты үздік ресурс деп танылды.

Бастауыш кәсіподақ ұйымдары арасында Федоров ауданы Мәншүк Мәметова атындағы мектептің бастауыш кәсіподақ ұйымының @ppomametova Instagram аккаунты жеңімпаз болды.

Бұл парақшалар кәсіподақ өмірі туралы жай ғана хабарлап қоймайды. Олар оның тарихын сақтауға, тәжірибе бөлісуге, адамдармен байланысты нығайтуға және маңызды мәселелерді түсінікті тілмен жеткізуге көмектеседі.

Жеңімпаздарға кәсіподақ қызметін сапалы ақпараттық сүйемелдегені үшін алғыс айтамыз. Жаңа идеялар, қызықты контент, белсенді аудитория және алдағы шығармашылық табыстар тілейміз!

Ақпараттық жұмысты дамыту жаңа технологияларды меңгерусіз мүмкін емес. Филиалдар мен мүшелік ұйымдардың 30-дан астам төрағасы жасанды интеллект пен цифрлық құралдарды қолдану, сондай-ақ коммуникация мен басқарудың заманауи әдістері бойынша оқудан өтті. Алған білімдері кәсіподақ ұйымдарының күнделікті жұмысында қолданылып жатыр.

Еңбекті бағалау және жетістіктерін құрметтеу

Қазақстан Республикасының Кәсіподақтар күніне орай бірлестігімізде филиалдар қызметінің тиімділігіне рейтингтік бағалау қорытындылары дәстүрлі түрде шығарылды. Бұл – ашықтық пен айқындықтың тағы бір механизмі. Бағалау алты бағыт бойынша 62 көрсеткішті қамтиды және іс жүзінде жүргізіліп жатқан бүкіл кәсіподақ жұмысының сапасын көрсетеді.

2026 жылғы рейтингтік бағалауда аудандық филиалдар арасында Қарабалық аудандық білім қызметкерлерінің кәсіподақ ұйымы көш бастады. Төрайымы – Жалынсын Улмесхановна Маралбаева.

Қалалық филиалдар мен облыстық деңгейдегі филиал арасында Рудный қалалық білім қызметкерлерінің кәсіподақ ұйымы жеңімпаз атанды. Төрайымы – Амина Оразайқызы Мурзатаева.

Жеңімпаздарды шын жүректен құттықтаймын! Алдағы жұмыстарына табыс, жаңа идеялар мен жетістіктер тілеймін.

Рейтинг пен басқа да кәсіподақ байқауларының жеңімпаздары және жүлдегерлері Мұғалімдер күні мен Кәсіподақтар күніне арналған салтанатты іс-шараларда марапатталды.

Сондай-ақ кәсіподақ мүшелерінің кәсіподақ қозғалысын дамытуға қосқан елеулі үлесі атап өтілді. Жергілікті кәсіподақтың 32 мүшесі «ADAL» федерациясы мен «Өрлеу» салалық кәсіподағының республикалық наградаларына ие болды. Тағы 172 адам «Еңбек ардагері» медалімен, «Қостанай облысы білім қызметкерлерінің кәсіподақ қозғалысына сіңірген еңбегі үшін» және «Кәсіподақ сенімі» төсбелгілерімен, сондай-ақ Жергілікті кәсіподақтың құрмет грамоталарымен марапатталды.

Кәсіби еңбекті мойындап құрметтеудің тағы бір түрі – Жергілікті кәсіподақ тағайындаған «Мерей» жыл сыйлығы. Биыл оның лауреаты 23 кәсіподақ мүшесі болды. Лауреаттармен «Учительская плюс» газетінің осы санынан танысуға болады – оларға тұтас бір бет арналған.

Біз үшін даму дегеніміз — дәстүрлі құндылықтарды сақтау, оларды нақты істерде ұстану, сенімді нығайту және алға қарай ұмтылу.

Қазақстанның Кәсіподақтар күнімен ұйымымыздың барлық мүшелерін және кәсіподақ қозғалысына қатысы бар барша азаматтарды құттықтаймын!

Филиалдар мен бастауыш кәсіподақ ұйымдарының төрағаларына, сондай-ақ кәсіподақ белсенділеріне ерекше алғыс айтамын. Сіздер әрдайым еңбек адамдарының жанынан табылып, олардың мұң-мұқтажын біліп, мәселелерін шешуге атсалысып, қиын сәттерде қолдау көрсетіп келесіздер. Сіздердің қажырлы еңбектеріңіздің арқасында ұйымымызға деген сенім артып келеді.

Сіздердің көпшілігіңіздің осы игілікті іске ондаған жылдар бойы адал қызмет етіп келе жатқандарыңыз ерекше құрметке лайық. Бастауыш ұйымдарымызда 40-тан астам төраға 10 жылдан 20 жылға дейін, ал бес төраға 20 жылдан астам уақыт бойы өз міндетін абыроймен атқарып келеді. Бұл — мол тәжірибенің, адамдардың сенімінің және ұрпақтан-ұрпаққа жалғасып келе жатқан кәсіподақ дәстүрлеріне адалдықтың айқын көрінісі. Еңбек өтілі ең жоғары бес төраға туралы «Учительская плюс» газетінің жаңа санындағы «Еңбек жолы» айдарында арнайы баяндалады.

Кәсіподақ қозғалысының ардагерлеріне өздерінің мол тәжірибесімен бөлісіп, ортақ іске адалдық танытып, бүгінгі таңда жаңа буын жалғастырып келе жатқан игі дәстүрлерді сақтағандары үшін шынайы алғысымды білдіремін. Әлеуметтік әріптестерімізге — білім беру саласының басшыларына — өзара ынтымақтастық, ашық әрі сындарлы сындарлы пікір алмасу және қызметкерлер үшін маңызды мәселелерді бірге шешуге деген дайындықтары үшін үлкен ризашылығымды білдіремін.

Осы мақалада айтылған барлық нәтижелерге бірлескен күш-жігеріміздің арқасында қол жеткіздік. Бізді кәсіподақты нығайту және оның мүшелеріне көрсетілетін қолдауды қолжетімді әрі тиімді етуге деген ұмтылыс біріктіреді. Жинақталған тәжірибені сақтап, қол жеткізген жетістіктермен шектелмей, алға қарай нық қадам басу біз үшін маңызды.

Сіздерге және жақын жандарыңызға мықты денсаулық, амандық, бақ-береке, көңіл тыныштығын тілеймін. Ертеңгі күнге деген сенімдеріңіз арта берсін. Еңбектеріңіз әрдайым лайықты нәтижесін беріп, өмірлеріңіз қуанышты да жарқын сәттерге толы болсын. Сенімдеріңіз бен белсенділіктеріңіз үшін шын жүректен алғыс айтамын!

Василий Цымбалюк, Қостанай облысы білім және ғылым ұйымдары қызметкерлерінің жергілікті кәсіподағының төрағасы, педагогика ғылымдарының кандидаты