Шәкірт жүрегінен орын алған ұстаз

Ұстаз болу – жай ғана мамандық емес, ол – жүрек қалауы мен ұлт болашағына деген жауапкершілікті талап ететін қасиетті жол. Осы жолды өмірлік мұратына айналдырып, саналы ғұмырын шәкірт тәрбиесіне арнаған жандардың бірі – Қостанай облысы әкімдігі білім басқармасының «Жангелдин ауданы білім бөлімінің Ыбырай Алтынсарин атындағы жалпы білім беретін мектебі» КММ-сінің бастауыш сынып мұғалімі, педагог-зерттеуші #Сейтенова Гүлслайым Төлеуовна.

Гүлслайым Төлеуовна 1965 жылдың 1 қарашасында Жангелдин өңіріндегі Шеген ауылында дүниеге келді. Балалық шағынан білімге құштар болып өскен ол 1973 жылы Амангелді орта мектебінің табалдырығын аттап, шәкірттік жолын бастайды. Ұстаздыққа деген сүйіспеншілік оны ерте жетелеп, 1982 жылы Арқалық педагогикалық училищесінің бастауыш сынып бөліміне алып келді. 1986 жылы оқуын тәмамдап, жүрек таңдаған мамандығына нық қадам басты.

Еңбек жолын 1986 жылы Амангелді орта мектебінде бастауыш сынып мұғалімі болып бастаған жас маман аз уақыт ішінде өз ісіне жауапкершілігімен, бала жанына жақындығымен танылды. 1989–1998 жылдары «Қарғалы бастауыш мектебінде» мектеп меңгерушісі әрі мұғалім қызметін қатар алып жүріп, ауыл мектебінің дамуына елеулі үлес қосты. Ал 1999 жылдан бері Ыбырай Алтынсарин атындағы жалпы білім беретін мектепте табысты еңбек етіп келеді.

Нағыз ұстаздың ерекшелігі – үздіксіз ізденісінде. Осы ұстанымды берік ұстанған Гүлслайым Төлеуовна 2003–2006 жылдары Арқалық педагогикалық институтында білімін жалғастырып, бастауыш сынып әдіскері мамандығын меңгерді. Бүгінде педагог-зерттеуші санатындағы тәжірибелі ұстаз оқу мен тәрбиені ұштастырып, шәкірт бойына біліммен қатар ұлттық құндылықтарды сіңіріп келеді.

Ұстаз еңбегінің өлшемі – шәкірт жетістігі. Бұл тұрғыда Гүлслайым Төлеуовнаның еңбегі ерекше. Оның тәрбиелеген шәкірттері білім, ғылым, өнер және зияткерлік бағыттағы түрлі байқаулар мен олимпиадаларда мектеп мерейін үстем етіп жүр. «ПОНИ» халықаралық байқауында Төлеу Ақерке, Ақбергенқызы Ұлбике, Бірмұханов Дінмұхамбет, Сапар Фатима жүлделі орындарға ие болды. «Абай оқулары» республикалық байқауында Қуанышқызы Нұрсезім ІІ дәрежелі дипломмен марапатталды.

Соңғы жылдары да ұстаз еңбегінің жемісі айқын көрінді. Төрехан Расул «Ақбота» зияткерлік олимпиадасында жүлделі орын алса, Махбұт Тәуекел мен Төлеухан Аяулым ғылыми жоба жұмыстарында табысқа жетті. Ерболат Жеңісбек «Атамекен» олимпиадасында үздік нәтиже көрсетсе, Ғалибек Ғамзат аудандық «Алтын сақа» және «Бастау» олимпиадаларында жеңімпаз атанып, облыстық деңгейде де жүлдегер болды. Бұл – шәкірт табысының артында ұстаздың маңдай тері мен тынымсыз ізденісі тұрғанының айқын дәлелі.

Ұзақ жылғы жемісті еңбек қоғам назарынан тыс қалған емес. Гүлслайым Төлеуовна облыстық және аудандық деңгейдегі көптеген марапаттарға ие болды. 2022 жылы «Өскелең ұрпақты оқыту және тәрбиелеу ісіндегі жетістіктері мен білім беру саласына сіңірген ерекше еңбегі үшін» облыстық грамотамен марапатталса, сол жылы аудандық «Ең үздік бастауыш мұғалімі» байқауында І орынды жеңіп алды. Сонымен қатар Қостанай облыстық Тілдер басқармасының Алғыс хаты, ғылыми-білім беру орталығының Құрмет грамотасы және Жангелдин ауданы әкімінің 2026 жылғы Алғыс хаты – ұстаз еңбегіне берілген жоғары бағаның белгісі.

Гүлслайым Төлеуовна үшін ұстаздық – қызмет емес, өмірлік ұстаным. Ол әр шәкірттің жүрегіне сенім ұялатып, білімге деген қызығушылығын оята білді. Ұстаздың мейірімі мен талапшылдығы, кәсіби шеберлігі мен адамгершілік қасиеті оны шәкірттеріне ғана емес, әріптестеріне де үлгі етіп келеді.

Еңбекпен өрілген өмір ешқашан елеусіз қалмайды. Гүлслайым Төлеуовнаның ғұмыры – ұстаздыққа адалдықтың, шәкіртке деген шексіз сүйіспеншіліктің және білім жолындағы табанды еңбектің жарқын көрінісі. Саналы ғұмырын бала тәрбиесіне арнаған осындай ұстаздардың еңбегімен елдің ертеңі қалыптасады, ұлттың болашағы кемелденеді.

Ұстаздың ең үлкен марапаты – шәкірт жетістігі десек, Гүлслайым Төлеуовна сол бақытқа жеткен жан. Оның өнегелі жолы әлі талай жас педагогке бағдар болып, шәкірт жүрегінде мәңгі сақталары анық.